“Me Zotin para, në fund të këtij Ramazani bëhet përurimi i shtëpive në Thumanë”

Shumëkush mundet të rikthejë në memorje tronditjen që pësoi një Shqipëri e tërë nga tërmeti i 26 nëntorit. 51 jetë shqiptarësh humbën, ndërsa në ditët pasuese u shpërfaq para nesh magnituda e vërtetë e tragjedisë.

Në Thumanë, atje ku tërmeti e ktheu qytezën në gërmadhë, në fytyrat e cilitdo gjeje dëshpërim e tronditje. Emisioni “Shqiptarët për Shqiptarët” i vuri vetes për qëllim një mision, ndihmën për ata shqiptarë që humbën të dashurit e tyre, familjarë, prindër, fëmijë…

Vështirësitë nuk qenë të pakta, por tashmë na presin veçse lajme të gëzueshme.

Një lajm të madh e dha vetë Elvis Naçi, gjatë mbrëmjes së djeshme në emisionin N’Kosovë Show’. Drejtuesi i programit Shpëtim Desku e pyeti Elvisin se kur do të jepen shtëpitë e ndërtuara tashmë në Thumanë për banorët.

“Shqiptarët e kanë ndërtuar Thumanën, por shqiptarët nuk do të ishin mobilizuar kurrë deri në atë pikë, po të mos e kishin një shqiptar si Elvis Naçi. Elvisi ishte zëri i thirrjes, i arsyes, i besimi e i kushtrimit të shqiptarëve. Tash tregona, sa shtëpi janë ndërtuar e kur do të bëhet përurimi i Thumanës që ju me të gjithë shqiptarët nëpër botë i keni ndërtuar?”-tha Desku.

“Aktualisht janë 150 shtëpi që janë bërë në Thumanë. Me Zotin para, në fund të këtij Ramazani të bekuar, do të bëhet përurimi i shtëpive.”– tha Elvis Naçi.

“Elvis ne besoj me stafin tonë do të jemi aty?”-pyeti Desku.

“Po patjetër, do të jemi në rreshtin e parë”-u përgjigj Elvisi.